ՄԱԿ-ի բնակչության հիմնադրամի « Սեռական և վերարտադրողական առողջության ծառայությունների հզորացում» ծրագրի շրջանակներում կատարված հետազոտությունների արդյունքում պարզվել է, որ 15 տարի հետո Հայաստանում տղամարդիկ մեծ դժվարությամբ են հարսնացու գտնելու, քանի որ աղջկա դեֆիցիտ է լինելու:
Պատճառն այն է, որ աղջիկ երեխաների ծնունդը զանգվածաբար կանխվում է: Այսօր հղիության արհեստական ընդհատումը չի մտահոգում ոչ ոքի, սակայն դա այնքանով է լուրջ խնդիր, որ աղջիկների թվի պակասի հետևանքով ընտանիքների թիվը մեր երկրում նվազելու է, կամ էլ խառնամուսնությունների թիվն է աճելու:
Սեռով պայմանավորված հղիության արհեստական ընդհատման արդյունքում Հայաստանում տարեկան 1400 աղջիկ երեխաներին աբորտ են անում:
Հետազոտության տվյալներով` Հայաստանում տղա երեխաների ծնունդը 15%-ով գերազանցում է. ներկայում 118-120 նորածին տղային բաժին է ընկնում 100 աղջիկ:
Նշենք, որ այս խնդրի առաջ կանգնած են նաև չինացիները: Իշխանությունները լուրջ մտահոգություն են հայտնել այն մասին, որ աղջիկ երեխաների ծնունդը կտրուկ նվազել է: Այս արատավոր երևույթի դեմ պայքարի միակ միջոցն այն կլինի, որ արգելվի նախօրոք ծնողներին ասել երեխայի սեռը:
